Image via Wikipedia

Perché on rimari? Per fà poesia, naturalment, ma minga domà per quell.
Per el milanes, compagn di alter lengov, la poesia, l’è la linfa vital, l’è el nutriment che scòd la famm de la nosta anema. La letteradura, la prosa, hinn different. Metten in fira di ragionament, descriven i ròbb precis, ma hinn minga compagn. La poesia, l’Art de la parolla, l’è l’unega espression de l’umanità che l’ha pò sviscerà quel sentiment olistegh del tusscoss, ch’el mett insemma quell che la società moderna el voeur spartì: l’omm e la natura: el po’ minga esist la natura senza l’omm o l’omm senza natura: l’essere metafisich omm-natura el parla con la vos de la poesia! El spiret poetich del Pasolini, come el racconta luu de primma man, l’è staa risvegliaa da ona parolla, o mej, dal sòn de la parolla: “rosada”. A quej temp là, la lengua furlana l’era maj stada scrivuda e, adess, anca per merit del stess Pasolin, l’è stada recognossuda. Ecco, el podè de la parolla e de la poesia!
Per nunch l’è different, la nosta vos l’ha mai desmettuu de fass sentì. Dal ‘500 al dì d’incoeu, poetta e scrittur hann faa letteradura, hann faa cultura. I maester de semper, Carlo Maria Maggi, Domenico Balestrieri, Carlo Porta, e anmò, Emilio De Marchi, Delio Tessa, Franco Loi e tucc quej che al dì d’incoeu goden anmò a fass ciamà poetta.
Insomma, per la nosta lengua gh’è domà ona parolla che la pò descriv ben el so andà: continuità.
E allora, on auguri de scriv tant, in rima o nò l’è istess, ma semper cont el coo e … in milanés.